იუვე ნიუკასლის მცველის ტრანსფერით ინტერესდება

იუვენტუსი ცენტრალური მცველის ტრანსფერზე მუშაობას აგრძელებს და ჯანლუკა დი მარციოს ინფორმაციით, ბიანკონერის ერთ-ერთი სამიზნე ნიუკასლის უკანახაზელი ლლოიდ კელი გახლავთ.

26 წლის ინგლისელი ნიუკასლს გასულ ზაფხულს შეუერთდა, თუმცა გუნდში თავი ვერ დაიმკვიდრა და მიმდინარე სატრანსფერო ფანჯრის პერიოდში ნიუკასლის დატოვების წინააღმდეგი არ არის.

დი მარციოს ცნობით, იუვენტუსი კელის ფიკაიო ტომორის ალტერნატივად მოიაზრებს. ბიანკონერიმ მილანთან ტომორის ტრანსფერის ფორმულასთან დაკავშირებით შეთანხმებას მიაღწია, მაგრამ ჯერჯერობით ფიკაიოს გუნდის დატოვება არ სურს, ამიტომ ჯუნტოლის მისი ალტერნატივების ძებნა უწევს.

კელის გაფორმება იუვენტუსს დაახლოებით 15-20 მილიონ ევროდ შეეძლება.